ಕೆಜಿಎಫ್ ಟ್ರೇಲರ್‌ಗೆ ಅಭಿಮಾನಿಗಳು ಫಿದಾ
ಸಿನಿಪ್ರಿಯರು ಮತ್ತು ಅಭಿಮಾನಿಗಳು ಬಹು ದಿನಗಳಿಂದ ಕಾದು ಕುಳಿತಿದ್ದ ಬಹು ನಿರೀಕ್ಷಿತ ‘ಕೆಜಿಎಫ್’-೨’ ಚಿತ್ರದ ಮೊದಲ ಟ್ರೇಲರ್ ಐದು ರಾಜ್ಯಗಳ ಪತ್ರಕರ್ತರ ಸಮ್ಮುಖದಲ್ಲಿ ಬಿಡುಗಡೆಗೊಂಡಿತು. ಬಾಲಿವುಡ್‌ನ ಕರಣ್‌ಜೋಹರ್ ನಿರೂಪಣೆ ಮಾಡಿದ್ದು ವಿಶೇಷವೆನಿಸಿತ್ತು. ಕನ್ನಡ ಟ್ರೇಲರ್‌ಗೆ ಚಾಲನೆ ನೀಡಿದ ಶಿವರಾಜ್‌ಕುಮಾರ್ ಮಾತನಾಡಿ ಯಶ್ ಮೊದಲಿನಿಂದಲೂ ನನಗೆ ಇಷ್ಟ. ತಮ್ಮನ ಹಾಗೆ ಇರುವವರು. ಎಲ್ಲರಂತೆ ನಾನು ಸಿನಿಮಾ ನೋಡಲು ಕಾಯುತ್ತಿದ್ದೇನೆ. ಫಸ್ಟ್ ಡೇ ಫಸ್ಟ್ ಷೋಗೆ ಹೋಗಲು ಕಾತುರನಾಗಿದ್ದೇನೆ ಎಂದರು.
. ಮಾಲಿವುಡ್ ನಟ ಪೃಥ್ವಿರಾಜ್ ಮಲೆಯಾಳಂ ಭಾಷೆಯ ತುಣುಕುಗಳನ್ನು ಅನಾವರಣಗೊಳಿಸಿದರು. ಪ್ರಾದೇಶಿಕ ಭಾಷೆಯ ಚಿತ್ರವು ಈ ಮಟ್ಟಕ್ಕೆ ಬಂದು ನಿಂತಿರುವುದು ನಮಗೆಲ್ಲರಿಗೂ ಹೆಮ್ಮೆಯ ವಿಷಯವಾಗಿದೆ. ‘ಬಾಹುಬಲಿ’ಯಂತೆ ನಾವು ಕನಸು ಕಾಣಬಹುದು. ರಾಜಮೌಳಿ ಮತ್ತು ಪ್ರಶಾಂತ್‌ನೀಲ್ ಭಾರತ ಕಂಡ ಶ್ರೇಷ್ಟ ನಿರ್ದೇಶಕರು. ಈ ಸಿನಿಮಾದ ವಿತರಣೆ ಸಿಕ್ಕಿದ್ದು ನನ್ನ ಅದೃಷ್ಟ ಎಂದು ಹೇಳಿದರು.
ಎಂಟು ವರ್ಷದ ಪ್ರಯಾಣ. ಎಲ್ಲವನ್ನು ಎಷ್ಟು ಸಾದ್ಯವೋ ಅಷ್ಟನ್ನು ಹೇಳುವ ಪ್ರಯತ್ನ ಮಾಡಿದ್ದೇನೆ. ಇನ್ನು ನೀವುಗಳು ಚಿತ್ರ ನೋಡಿ ಹೇಗಿದೆ ಅಂತ ಹೇಳಬೇಕು. ನಮ್ಮ ಕನ್ನಡ ಚಿತ್ರರಂಗಕ್ಕೆ ಇಡೀ ಇಂಡಿಯಾದಲ್ಲಿ ಒಂದು ಸ್ಥಾನ ಸಿಕ್ಕಿದೆ. ಅದಕ್ಕೆ ಮೂಲ ಕಾರಣಕರ್ತರಾದ ಕನ್ನಡ ಜನತೆಗೆ ನನ್ನ ನಮಸ್ಕಾರ ಅಂತಾರೆ ನಿರ್ದೇಶಕ ಪ್ರಶಾಂತ್‌ನೀಲ್. ಯಶ್, ಬಾಲಿವುಡ್ ನಟ ಸಂಜಯ್‌ದತ್, ನಾಯಕಿ ಶ್ರೀನಿಧಿಶೆಟ್ಟಿ, ರವೀನಾಟಂಡನ್, ವಿತರಕ ಅನಿಲ್‌ತಡಾನಿ, ರಿತೇಶ್, ನಿರ್ಮಾಪಕ ವಿಜಯ್‌ಕಿರಗಂದೂರು ಮೊದಲಾದವರು ಕಾರ್ಯಕ್ರಮದಲ್ಲಿ ಉಪಸ್ತಿತರಿದ್ದು ಖುಷಿಯನ್ನು ಹಂಚಿಕೊಂಡರು. ಇನ್ನು ತಮಿಳಿನಲ್ಲಿ ಸೂರ್ಯ, ತೆಲುಗುದಲ್ಲಿ ರಾಮ್‌ಚರಣ್‌ತೇಜ ವಿಡಿಯೋ ಮೂಲಕ ಶುಭ ಹಾರೈಸಿದರು. ಸುಮಾರು ಎರಡು ಗಂಟೆಗಳ ಕಾಲ ನಡೆದ ಸಮಾರಂಭದ ಕೊನೆಯಲ್ಲಿ ಪತ್ರಕರ್ತರುಗಳಿಂದ ಕೇಳಿ ಬಂದ ಪ್ರಶ್ನೆಗಳಿಗೆ ತಂಡವು ಉತ್ತರ ನೀಡಿತು.
