ನಮೋ ಭೂತಾತ್ಮ-೨ ಟೀಸರ್ ಬಿಡುಗಡೆ
‘ನಮೋ ಭೂತಾತ್ಮ’ ಚಿತ್ರವು ೯ ವರ್ಷಗಳ ಹಿಂದೆ ತೆರೆಕಂಡು ಹಿಟ್ ಆಗಿತ್ತು. ಈಗ ‘ನಮೋ ಭೂತಾತ್ಮ-೨’ ಸೀಕ್ವೆಲ್ ಸದ್ದಿಲ್ಲದೆ ಸಿದ್ದಗೊಂಡಿದೆ. ಜಾನರ್ ಅದೇ ಆಗಿದ್ದರೂ ಕಥೆ ಮತ್ತು ಪಾತ್ರಗಳು ಬೇರೆಯದೆ ಆಗಿರುತ್ತದೆ. ನೃತ್ಯ ಸಂಯೋಜಕ ಮುರಳಿ ಎರಡನೇ ಭಾಗಕ್ಕೂ ಅಕ್ಷನ್ ಕಟ್ ಹೇಳಿದ್ದಾರೆ. ಎಂ.ಎಸ್.ಗೋಲ್ಡನ್ ಪಿಕ್ಚರ‍್ಸ್ ಮೂಲಕ ನಿರ್ದೇಶಕರ ಅಕ್ಕನ ಮಗ ಸಂತೋಷ್‌ಶೇಖರ್ ಹಾಗೂ ಮುರಳಿ ಜಂಟಿಯಾಗಿ ನಿರ್ಮಿಸಿದ್ದಾರೆ. ಪ್ರಚಾರದ ಮೊದಲ ಹಂತವಾಗಿ ಟೀಸರ್‌ನ್ನು ಧ್ರುವಸರ್ಜಾ ಬಿಡುಗಡೆ ಮಾಡಿದರು.
ನಂತರ ಮಾತನಾಡಿದ ನಿರ್ದೇಶಕರು ಧ್ರುವ ಅವರು ನಮಗೋಸ್ಕರ ಶೂಟಿಂಗ್‌ನ್ನು ಮುಂದೆ ಹಾಕಿ ಬಂದಿದ್ದಾರೆ. ಸಿನಿಮಾ ಆಗಲು ಮೂವರು ಕಾರಣ ಆಗಿರುತ್ತಾರೆ. ನನ್ನ ಕುಟುಂಬ, ಸಂತೋಷ್ ಹಾಗೂ ಕೋಮಲ್. ಕರೋನ ಮುಂಚೆನೇ ಚಿತ್ರಕಥೆ ಸಿದ್ದ ಮಾಡಿಕೊಂಡಿದ್ದೇವು. ಚಾನೆಲ್ ಆಫೀಸ್ ಸೆಟ್ ಹಾಕಿ, ಅಲ್ಲದೆ ಚಿಕ್ಕಮಗಳೂರಿನಲ್ಲಿ ಹೆಚ್ಚಿನ ಭಾಗದ ಚಿತ್ರೀಕರಣ ನಡೆಸಲಾಗಿದೆ. ಸದ್ಯದಲ್ಲೇ ಸೆನ್ಸಾರ್ ಹಂತಕ್ಕೆ ಹೋಗಲಿದೆ ಎಂದರು.
ಪಾರ್ಟ್-೧ಗೆ ನಾನೇ ಬಂಡವಾಳ ಹೂಡಿದ್ದೆ. ಅದು ದೊಡ್ಡ ಮಟ್ಟಕ್ಕೆ ತೆಗೆದುಕೊಂಡು ಹೋಗಿತ್ತು. ಹಲವು ದೊಡ್ಡ ಚಿತ್ರಗಳ ನಡುವೆ ನಮ್ಮದು ಸರಿಯಾಗಿ ಜನರಿಗೆ ತಲುಪಲಿಲ್ಲ. ಕಾಮಿಡಿ, ಹಾರರ್ ಇರಲಿದ್ದು, ಶೇಕಡ ೫೦ರಷ್ಟು ನಗಿಸಿದರೆ, ಉಳಿದವು ಹೆದರಿಸುತ್ತದೆ. ವಾಹಿನಿ ಪತ್ರಕರ್ತನಾಗಿ ಕಾಣಿಸಿಕೊಂಡಿದ್ದೇನೆಂದು ನಾಯಕ ಕೋಮಲ್‌ಕುಮಾರ್ ಹೇಳಿದರು.
ನಾಯಕಿ ಚಂದ್ರಲೇಖಾ ಇವರೊಂದಿಗೆ ಮೋನಿಕಾ, ಜೀಜಿ, ರುದ್ರೇಶ್, ಮಹಾಂತೇಶ್, ವರುಣ್ ಎಲ್ಲರೂ ಪಾತ್ರದ ಪರಿಚಯ ಮಾಡಿಕೊಂಡರು. ಅರುಣ್‌ಆಂಡ್ರ್ಯೂ ಸಂಗೀತ, ಹಾಲೇಶ್ ಛಾಯಾಗ್ರಹಣ ಇರಲಿದೆ.
