ಮುರುಗ ಸನ್ ಆಫ್ ಕಾನೂನುಗೆ ಪ್ರೇಮ ಸಾಥ್
‘ಅಗ್ನಿಸಾಕ್ಷಿ’ ಧಾರವಾಹಿಯಲ್ಲಿ ಹೆಸರು ಗಳಿಸಿದ್ದ ಮುನಿಕೃಷ್ಣ ನಾಯಕನಾಗಿ ನಟಿಸಿದ್ದ ‘ಕೊಡೆಮುರುಗ’ ಹಿಟ್ ಆಗಿತ್ತು. ಇದರಿಂದ ಪ್ರೇರಿತಗೊಂಡ ಮುನಿಕೃಷ್ಣ ಅವರು ಎ.ಎಸ್.ಎ.ಪ್ರೊಡಕ್ಷನ್ ಬ್ಯಾನರ್ ಸಂಸ್ಥೆ ಶುರು ಮಾಡಿ ‘ಮುರುಗ ಸನ್ ಆಫ್ ಕಾನೂನು’ ಚಿತ್ರಕ್ಕೆ ನಾಯಕನ ಜತೆಗೆ ಬಂಡವಾಳ ಹೂಡಿದ್ದಾರೆ. ಪ್ರಚಾರದ ಸಲುವಾಗಿ ಟ್ರೇಲರ್ ಬಿಡುಗಡೆ ಸಮಾರಂಭಕ್ಕೆ ನಟಿ ಪ್ರೇಮಾ ಆಗಮಿಸಿ ತಂಡಕ್ಕೆ ಶುಭ ಹಾರೈಸಿದರು. ವಿಜಯ್ ಪ್ರವೀಣ್ ಆಕ್ಷನ್ ಕಟ್ ಹೇಳಿದ್ದಾರೆ. ಪವರ್ ಸ್ಟಾರ್ ಪುನೀತ್‌ರಾಜ್‌ಕುಮಾರ್ ಟೈಟಲ್ ಲಾಂಚ್ ಮಾಡುವ ಮೂಲಕ ಚಾಲನೆ ನೀಡಿದ್ದರಂತೆ.
ಜಾಗ ಕೇಳಿಕೊಂಡು ಊರಿಗೆ ಬರುವ ಖಳನಾಯಕ ನಂತರ ಇಡೀ ಊರನ್ನೇ ಕಬ್ಜ ಮಾಡಿಕೊಂಡು ಮುರುಗನ ತಂದೆಯನ್ನು ಕೊಲೆ ಮಾಡಿಸುತ್ತಾನೆ. ಎಲ್.ಎಲ್.ಬಿ ಓದಿಕೊಂಡಿದ್ದ ಮುರುಗ ಹೇಗೆ ಕಾನೂನಾತ್ಮಕವಾಗಿ ತನ್ನ ಜಾಗ ಮತ್ತು ಊರನ್ನು ಯಾವ ರೀತಿ ಉಳಿಸಿಕೊಳ್ಳುತ್ತಾನೆ ಎಂಬುದು ಕಥಾಹಂದರ.
ಹಳ್ಳಿ ಹುಡುಗಿಯಾಗಿ ಮಮತಾರಾವುತ್, ಕಿರಣ್‌ಯೋಗೇಶ್ವರ ನಾಯಕಿಯರು. ಈವರೆಗೆ ನಾಯಕನಾಗಿ ಅಭಿನಯಿಸದ್ದ ಧನ್ವೀರ್ ಖಳನಾಗಿ, ಉಳಿದಂತೆ ಶೋಭರಾಜ್, ರಮೇಶ್‌ಭಟ್ ಮುಂತಾದವರು ಬಣ್ಣ ಹಚ್ಚಿದ್ದಾರೆ. ದ್ವೈಪಾಯನ್ ಸಿಂಗ್ ಸಂಗೀತ, ಶಂಕರ್ ಛಾಯಾಗ್ರಹಣ, ಸಿ.ರವಿಚಂದ್ರನ್ ಸಂಕಲನ, ಥ್ರಿಲ್ಲರ್‌ಮಂಜು ಸಾಹಸ ಇರಲಿದೆ. ಆನೇಕಲ್, ಮಲ್ಪೆ, ಬೆಂಗಳೂರು ಸುತ್ತಮುತ್ತ ೬೨ ದಿನಗಳ ಕಾಲ ಚಿತ್ರೀಕರಣ ನಡೆಸಲಾಗಿದೆ.
