ಭೀಮನಿಗೆ ಶಿವಣ್ಣ ಶುಭಹಾರೈಕೆ

       ದುನಿಯಾವಿಜಯ್ ನಿರ್ದೇಶನ ಮತ್ತು ನಾಯಕನಾಗಿ ನಟಿಸಿರುವ ‘ಭೀಮ’ ಚಿತ್ರವು ಆಗಸ್ಟ್ ೯ಕ್ಕೆ ತೆರೆಕಾಣಲು ಸಿದ್ದತೆಗಳು ನಡೆಯುತ್ತಿದೆ. ಕೃಷ್ಣಸಾರ್ಥಕ್ ಮತ್ತು ಜಗದೀಶ್‌ಗೌಡ ಜಂಟಿಯಾಗಿ ನಿರ್ಮಾಣ ಮಾಡಿದ್ದಾರೆ. ಶನಿವಾರ ಸಂಜೆ ನಡೆದ ಕಾರ್ಯಕ್ರಮದಲ್ಲಿ ಶಿವರಾಜ್‌ಕುಮಾರ್ ಟ್ರೇಲರ್ ಬಿಡುಗಡೆ ಮಾಡಿದರು. ನಂತರ ಮಾತನಾಡುತ್ತಾ ನನ್ನ ಮತ್ತು ವಿಜಯ್ ಪರಿಚಯ ಸುಮಾರು ೨೦ ವರ್ಷಗಳದ್ದು. ಅವರು ಹೀರೋ ಆಗುವುದಕ್ಕೆ ಮೊದಲೇ ನಾನು ನಟಿಸಿದ ‘ರಾಕ್ಷಸ’, ‘ಜೋಗಿ’ ಸಿನಿಮಾಗಳಲ್ಲಿ ನನ್ನೊಂದಿಗೆ ತೆರೆ ಹಂಚಿಕೊಂಡಿದ್ದರು. ಅಪ್ಪಾಜಿ ತೀರಿಕೊಂಡಿದ್ದರಿಂದ ‘ದುನಿಯಾ’ ಮುಹೂರ್ತಕ್ಕೆ ಬರಲಾಗಲಿಲ್ಲ. ಚಿತ್ರ ನೋಡುತ್ತಿನಿ ಎಂದಿದ್ದೆ. ೨೫ನೇ ಸಿನಿಮಾಕ್ಕೆ ನನಗೆ ಪ್ರಶಸ್ತಿ ಸಿಕ್ಕಿತ್ತು. ಆದರೆ ಇವರಿಗೆ ‘ದುನಿಯಾ’ ಸಿನಿಮಾದಲ್ಲಿ ಪ್ರಶಸ್ತಿ ಪಡೆದುಕೊಂಡರು. 

‘ಭೀಮ’ ಟ್ರೇಲರ್ ಸಮಾರಂಭದಲ್ಲಿ ಪುನೀತ್ ಇದ್ದಾರೆ. ‘ಸಲಗ’ ಚಿತ್ರದ ಟ್ರೇಲರ್ ಸಮಾರಂಭದಲ್ಲಿ ನಾನು, ಪುನೀತ್ ಬಂದಿದ್ದೇವು. ಈಗ ಪುನೀತ್ ಇಲ್ಲದಿರಬಹುದು. ಆದರೂ ನಮ್ಮ ಜೊತೆಗಿದ್ದಾನೆ. ಭೀಮನಿಗೆ ಅವನ ಆರ್ಶಿವಾದ ಇದೆ. ವಿಜಯ್ ನನಗೆ ಸಹೋದರನಿದ್ದಂತೆ. ಮುಂದೆ ನಾನು ಅವರ  ನಿರ್ದೇಶನದಲ್ಲಿ ನಟಿಸುವಂತಾಗಲಿ ಎಂದರು.

        ಪ್ರಸ್ತುತ ಸಮಾಜದಲ್ಲಿ ನಡೆಯುತ್ತಿರುವ ಹಲವು ನೈಜ ಘಟನೆಗಳು. ಇಂದಿನ ಯುವ ಪೀಳಿಗೆ ಹೊಸ ವ್ಯಸನಕ್ಕೆ ಒಳಗಾಗಿದ್ದಾರೆ. ಅದು ಪಾರ್ಥೇನಿಯಂ ಗಿಡಕ್ಕಿಂತಲೂ ವೇಗವಾಗಿ ಬೆಳೆದಿದೆ. ಇಂತಹ ವಿಷಯಗಳನ್ನು ಸ್ವತ: ನಿರ್ದೇಶಕರು ನೋಡಿ, ಇದರ ಕುರಿತಂತೆ ಒಂದಷ್ಟು ಸಂಶೋಧನೆ ನಡೆಸಿ ಅದನ್ನು ಚಿತ್ರರೂಪಕ್ಕೆ ಅಳವಡಿಸಿಕೊಂಡಿದ್ದಾರಂತೆ. ರಂಗಭೂಮಿ ಪ್ರತಿಭೆ ಅಶ್ವಿನಿಅಂಬರೀಷ್ ನಾಯಕಿ, ಖಳನಾಗಿ ಡ್ರ್ಯಾಗನ್ ಮಂಜು ಇವರೊಂದಿಗೆ ರಂಗಾಯಣರಘು, ಅಚ್ಯುತಕುಮಾರ್, ಸುಧಿಕಾಕ್ರೋಚ್, ಕಲ್ಯಾಣಿ, ಪ್ರಿಯಾಶಠಮರ್ಷಣ, ನಯನ ಸೂಡಾ ಮುಂತಾದವರು ಅಭಿನಯಿಸಿದ್ದಾರೆ. ಚರಣ್‌ರಾಜ್ ಸಂಗೀತ, ಶಿವಸೇನಾ ಛಾಯಾಗ್ರಹಣ, ಮಾಸ್ತಿ ಸಂಭಾಷಣೆ, ದೀಪು.ಎಸ್.ಕುಮಾರ್ ಸಂಕಲನ, ಚೇತನ್‌ಡಿಸೋಜ-ವಿನೋದ್-ಗೌತಮ್ ಸಾಹಸ, ಧನು ನೃತ್ಯ ಚಿತ್ರಕ್ಕಿದೆ.